Link açıqlığı

Saatnıñ esas haberi

Rusiye telükesizlik hadimleri Eski Qırımda yapılğan tintüvden soñ qırımtatar faaliyetçisini yaqaladılar – «Qırım birdemligi»


Rusiye telükesizlik hadimleri, yanvar 18 sabasında evinde tintüv yapılğan qırımtatar faaliyetçisi Giray Kulametovnı yaqalap alıp kettiler. Bunı Facebookta «Qırım birdemligi» cemiyet birleşmesi bildire.

Faaliyetçilerniñ ilk malümatına köre, Kulametovnı Kirovskiy rayonı içki işler bölügine (ROVD) alıp kettiler.

«Qırım birdemligi», saat 12-ge Kirovskiy rayonı mahkemesinde yaqalanğan faaliyetçige dair oturışuv ötkerilecek, dep iddia ete.

Qırım.Aqiqat vaqianıñ tafsilâtlarını ögrene. Rusiye telükesizlik strukturalarınıñ saytlarında bu tintüvniñ ötkerilmesi aqqında malümat yoq.

Eski Qırım şeeriniñ Oktâbrskaya soqağında yanvar 18 sabasında qırımtatarlarğa qarşı repressiyalarğa narazılıq köstermek maqsadınen ötkerilgen bir kişilik piketlerniñ iştirakçisi Giray Kulametovnıñ evinde tintüv yapıldı.

Oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG