Eski Qırım şeeriniñ Oktâbrskaya soqağında yanvar 18 sabasında qırımtatarlarğa qarşı repressiyalarğa narazılıq köstermek maqsadınen ötkerilgen bir kişilik piketlerniñ iştirakçisi Giray Kulametovnıñ evinde tintüv yapıla.
«Qırım birdemligi» cemiyet birleşmesiniñ Facebookta bildirgenine köre, aralarında olğan evniñ sakinleri ve şu cümleden Kulametovnıñ eki balasından telefonlarını musadere ettiler.
Evinde tintüv ötkerilgenniñ soyları tarafından bildirilgenine köre, onı içtimaiy ağlarda «ekstremistik malümat»nıñ darqatılmasında qabaatlamaq isteyler.
Faaliyetçiler, tahqiqat areketleri yapılğan evniñ yanına avtozaknıñ ketirilgenini bildireler.
Qırım.Aqiqat vaqianıñ tafsilâtlarını ögrene. Rusiye telükesizlik strukturalarınıñ saytlarında bu tintüvniñ ötkerilmesi aqqında malümat yoq.
Oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
