Link açıqlığı

Saatnıñ esas haberi

Rusiye telükesizlik hadimleri «talim» çerçivesinde Qırım köyüni qamaçavğa aldı – faaliyetçi


Yanvarniñ 17-sinde saba Rusiye telükesizlik hadimleri terrorğa qarşı talim çerçivesinde Qırımnıñ şarqındaki Nasipköy (Nasıpnoye) köyüni qamaçavğa aldılar. Bunı Qırım.Aqiqat içün bergen izaatta qırımtatar milliy areketiniñ faaliyetçisi Nariman Celâl söyledi.

Celâl: «Nasipköyniñ sakinleri, maña sabadan telefon etip, pek çoq polis hadimleriniñ köyniñ soqağında yerleşkenlerini bildirdiler. Blok postlarnı qoydı ve meskün yerni sanki qamaçavğa alğanları kibi türlü areketler yaptılar. Soraştırıp, Kefe şeerindeki şeer polis bölüginde bütün hadimlerniñ «terrorğa qarşı talim» keçirgenlerini bildim. Bu vaqıtta o, endi bitirildi», – dedi.

Onıñ aytqanına köre, telükesizlik hadimleri yaqalav ya da tintüvler yapmadı..

Rusiye telükesizlik strukturalarınıñ saytında yanvarniñ 17-sinde ilhaq etilgen Qırımda talim keçirmek planları aqqında malümat yoq.

Rusiye 2014 senesinde Qırımnı ilhaq etken soñ yarımadada er yıl arbiy talimler keçire.

Ukrainanıñ Baş ştabında, Rusiye tarafından ilhaq etilgen Qırımda keçirilgen arbiy talimlerge qanunsız deyler.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq ettiler. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG