Kremlniñ kontroli altında bulunğan Kefe şeer mahkemesi yanvarniñ 15-nde qırımtatarlarğa qol tutmaq maqsadınen yapılğan bir kişilik piketniñ daa bir iştirakçisi, Aziz Urimovnğa cöreme tayin etti. Qırım.Aqiqat muhbiriniñ bildirgenine köre, oña 10 biñ ruble (qararnen 4,9 biñ hrivna – QA) miqdarında cöreme tayin etildi.
Oturışuv esnasında polis hadimi sorğulanıp, Urimovnı kimse yaqalamadı ve o, İçki işler nazirligi bölügine barmağa göñülli olaraq razı oldı, dep işandırdı. Ondan soñ imayeniñ şaatı Edem Yakubov sorğulandı. O, patrul-post hizmeti (PPS) maşinasınıñ kelgenini ve Urimovdan plakat alğanlarını kördim, dep ifade etti. Yakubov bütün bu şeylerni telefonğa çıqardı.
Ondan ğayrı, oturışuv vaqtında akemge red bildirildi, lâkin akem hanım onı red etti.
Daa evel bildirilgeni kibi, Kefe şeer mahkemesi qırımtatarlarğa qol tutmaq maqsadınen yapılğan bir kişilik piketleriniñ eki iştirakçisi, Eral Dani ve Ruslan Rustemovğa cöreme tayin etti. Olarğa da 10 biñ ruble (qararnen 4,9 biñ hrivna – QA) miqdarında cöreme tayin etildi.
Oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
