Rusiye Tış işleri nazirliginiñ rehberi Sergey Lavrov, Qırım ilhaq etilgen soñ şekillgen sıñırlar çerçivesinde «Rusiye Ukrainanıñ topraq bütünligine ürmet köstere», dep iddia ete. Bunı Lavrov yanvarniñ 15-nde Ukraina ile Rusiye arasındaki bir-biriniñ topraq bütünligine ürmetniñ kösterilüvine dair halqara muqavelelerniñ cariy olmasını izalağanda bildirdi.
TASS agentligi Lavrovnıñ sözlerini naqil etip: «Biz böyle olduqça legalistik suallerge ve şu cümleden Ukrainanıñ nükleer silâsından vazgeçecegini ve, buña qarşılıq olaraq, Rusiye, AQŞ ve Büyük Britaniyaniñ Ukrainağa qarşı nükleer silâlarını qullanmaycaqlarına kefalet bergenlerini tasdiqlağan 1994 senesi Budapeşt memorandumına dair sualge endi çoq kere cevap berdik. Kene hatırlatam, biz Ukrainanı nükleer silânen qorquzmadıq ve oña qarşı onı qullanmadıq, bu sebepten memorandum iç bir şekilde bozulmadı. Aynı zamanda memorandum ile parallel olaraq Ukraina ayrı bir beyanatta ırqçı ve neonatsistik tendentsiyalarğa yüz bermemek mecburiyetini üstüne aldı», – dep bildirdi.
Onıñ fikrine köre, Menlik inqilâbından soñ olıp keçken vaqialar, «bu mecburiyetniñ pek qaba bir bozuluvı» oldı.
Rusiye TİN yolbaşçısı: «Minsk muqaveleleriniñ iç bir eksiksiz tolu kölemde yerine ketililmesi siyasiy ceetten bizim menfaatımızğa uyğun kele. Bu, bizim taraftan taqip etilgen, şimdiki sıñırlarda Ukrainanıñ suvereniteti ve topraq bütünligine tolu kölemde ürmet kösterüv yönelişine doğru kele», – dep ilâve etti.
Daa evel Rusiye Devlet dumasınıñ SNG ve yurtdaşlar ile alâqalar boyunca komiteti reisiniñ birinci muavini Konstantin Zatulin Rusiye ile Ukraina arasındaki Dostluq, emekdaşlıq ve ortaqlıq aqqında muqaveleniñ bir-biriniñ territorial sıñırlarını tanuv boyunca qısmını denonsatsiya etmege teklif etti.
Ukraina tarafından açıq menbalarda bu husuta izaatlar berilmedi.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusına dair dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
