Yanvarniñ 13-nde Berlinde Rusiye elçiligi yanında qırımtatarlarğa qol tutuv tedbiri ötkerildi. Bunı «Rus tilinde laf etken avropalılar forumı» tedbiriniñ teşkilâtçıları Facebookta bildirdiler.
Tedbir teşkilâtçılarınıñ bildirgenlerine köre, pikette Almaniye, Ukraina, Rusiye ve Türkiye vatandaşları iştirak etti.
Teşkilâtçılarnıñ bildirüvinde: «Qırımtatarlar işğalci akimiyet tarafından pek sert repressiyalarğa oğratılalar. Olarnı alıp qaça, eziyetley ve öldüreler. Bazılarnı sahte qabaatlavlar boyunca apishanelerge qapatalar. Digerlerni vatanlarını terk etmege mecbur eteler. Pek çoq qoranta, mecburen ayırılğan vaziyette bulunıp, Qırımda birleşip olamaylar. Qanunğa zıt kelmekten eñ uzaq olğan qırımtatar medeniy ve sport tedbirleri bile polis reydleri ile yekünlene», – denile.
Tedbirniñ iştirakçileri, deputatlarnıñ diqqatını celp etmek içün iş künü plakatlarnen Bundestag ögünde tekrar toplaşmağa niyet etkenlerini qayd ettiler.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
