Link açıqlığı

Qırım ile memuriy sıñırnıñ yanında qanunsız taşıyıcılarnıñ teşkerüvleri devam etecek – Ukraina akimiyeti


Ukrainanıñ Naqliyatta telükesizlik boyunca devlet hizmetiniñ hadimleri ilhaq etilgen Qırım yanındaki memuriy sıñırda taşıyıcılarnı teşkermege devam etmek niyetindeler.

Bunı Qırım.Aqiqatqa mezkür devlet hizmetindeki Qara deñiz bölgeler arası idaresiniñ yolbaşçısı İhor Pastuh, yanvarniñ 12-sinde aydavcılar tarafından «Harkiv-Aqmescit» trassasında naqliyat areketiniñ kesilmesi aqqında haberlerni izalağanda bildirdi.

Onıñ aytqanına köre, devlet hizmetiniñ hadimleri yol kenarında teşkerüvni yapqanda uquq bozuluvınıñ yedi faktını tesbit ettiler. – Aydavcılar taksi rejiminde çalışıp, litsenziyasız ve devlet qaydını yapmayıp yolcularnı Novoalekseyevka qasabasından «Çoñğar» keçit noqatasına qadar taşıy ediler. Bu faktlar boyunca mahkemege teslim etmek içün protokollar tizildi.

Pastuh: «Yigirmi qadar kişi, yol keçitinde yürip, başta kimseni yibermediler, soñ başta bir tarafqa, ve ondan soñ diger tarafqa yiberdiler. Aynı zamanda muessisege ait maşinanıñ yolunı qapattılar. Bundan soñ biz polisni çağırdıq, ve olar maşinanıñ yolunı açtı. Faaliyetke mania oluv faktı boyunca uquqqoruyıcı organlarına muracaat ettik», – dedi.

Muessisede, yolcularnı taşıma hizmetiniñ berilmesinde qanun bozuvları içün 17 biñ hrivnadan 34 biñ hrivnağa qadar miqdarda cöremeniñ tayin etile bilecegini ve qanun bozuv vaqiyası bir yıl içinde ekinci kere qayd etilse, naqliyat vastası musadere etilip, 34 biñ hrivna miqdarında cöremeniñ tayin etilecegini hatırlattılar. Aynı zamanda muddetsiz litsenziyanı resmen 1400 hrivnağa almaq mümkün.

Herson vilâyetinde, Qırım ile memuriy sıñırda, Çoñğar köyüniñ yanında yanvarniñ 12-sinde yolcuarnı ilhaq etilgen Qırımğa taşığan qanunsız taksilerniñ aydavcıları, yolcularnı taşıma hizmetiniñ berilüvi ile alâqalı iqtisadiy faaliyetniñ teşkerüvlerine narazılıq kösterip, «Harkiv-Aqmescit» avto yolunda naqliyat areketini kestiler.

Narazılıq tedbiriniñ iştirakçileri tarafından şimdilik izaatlar berilmedi.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ve yarımada arasında şeklen memuriy ve amelde aqiqiy «sıñır» peyda oldı. Memuriy sıñırda üç kontrol kiriş/çıqış noqtası çalışa – «Kalançak», «Çoñğar» ve «Çaplinka».

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG