Sabıq Qırım deputatı Ganışnıñ devletke hainligi aqqında işini baqqan Kyivniñ Dniprovskıy rayonı mahkemesi yerli telekanallarnıñ jurnalistleri ve sabıq Qırımnıñ baş naziri muavini, Dünya qırımtatar kongressi prezidentiniñ muavini Lenur İslâmovnıñ sorğulanmalarını yanvarniñ 22-sine keçirdi.
Bunı Qırım.Aqiqatqa advokat Andrey Rudenko bildirdi.
Advokat: «Lenur İslâmov, şaat olaraq, öyle de kelmedi. Biz, bizim imaye tarafımızdan taqdim etilgen videodelillerni baqıp çıqtıq. Şaatlardan biri bar edi, lâkin prokurorlar bunı körmedi», – dedi.
2017 senesi dekabrinde Kyivniñ Dniprovskıy rayonı mahkemesi Qırımnıñ sabıq deputatı Vasiliy Ganışnıñ işi boyunca ifadeler bermek içün bir qaç şaatnı davet etti.
Vasiliy Ganışnıñ işi boyunca mahkeme ceryanı endi eki yıldan ziyade devam ete.
2017 senesi fevralniñ 22-nde Ukrainanıñ Yuqarı adliye şurası, Vasiliy Ganışnıñ işi boyunca kollegiyası başında turğan akem Aleksey Fedükni becergen vazifesinden alıp taşladı. İşten çıqarılmasınıñ sebebi, Avromeydan zamanında narazılıq areketleriniñ eki faaliyetçisine qarşı bergen tevqif qararı oldı. Bu sebepten ötrü Kyivniñ Dniprovskıy rayonı mahkemesi aperlniñ 5-nde Ganışnıñ işini ğayrıdan baqıp başladı.
Sabıq deputat 2015 senesi aprelinde Qırımdan Ukrainanıñ qıtadaki qısmına kirgende onı SBU hadimleri Ukraina Devlet sıñır hizmeti ile birlikte yaqaladılar. Sabıq deputat qıdırılmaqta edi. Ukrainanıñ Baş prokuraturası tarafından oña devletke hainligi boyunca şübhe bildirildi.
Ukrainanıñ tahqiqatçıları Ganışnı, Qırımnıñ statusı boyunca «referendum»nıñ keçirilmesi içün rey berilgende oturışuvda bulunıp, onda kvorum yarattı ve böylelikle Ukrainanıñ topraq bütünligine qarşı doğrultılğan areketlerge qol tuttı, dep qabaatlaylar. Ondan ğayrı, siyasetçi, 2014 senesi aprelniñ 11-nde yarımadanıñ Rusiyege tabi parlamentiniñ oturışuvında Qırımnıñ Rusiye anayasasınıñ qabul etilmesi içün rey bergeninde qabaatlana.
Sabıq deputat özü, Qırım parlamentiniñ zalında «referendum»nıñ ötkerilmesine qarşı rey bergen yekâne kişi olğanını bildire. Onıñ fikrine köre, devletke hainlik boyunca qabaatlanması esassızdır.
