Link açıqlığı

AQŞ Devlet departamenti amerikalılarğa Qırımğa ve Şimaliy Kavkazğa barmaqnı tevsiye etmey


AQŞ Devlet departamenti, ilhaq etilgen Qırım ve Şimaliy Kavkazğa turizm ve iş maqsadınen barmaq istegen öz devletiniñ vatandaşlarına daa evel bergen tevsiyelerini yañarttı. Bu malümat, muessiseniñ saytında derc etilgen vesiqada bildirile.

AQŞ akimiyeti, anda bulunma riskleriniñ «terrorizm ve akimiyetniñ taqipleri» sebebinden bayağı artqanını bildirip, bu territoriyalarğa barmaqnı tevsiye etmey. Amerika akimiyetiniñ memurları içün bu eki bölgeni ziyaret etüv doğrudan-doğru yasaq etildi. Devlet departamenti aynı tevsiyelerni Türkiye, Livan, Nigeriya, Venesuela, Kuba ve Gonduras içün derc etti.

Devlet departamentı Qırım territoriyasını, er bir insan «işğalci akimiyet tarafından taqip etile bilecek» «ecnebiy devletniñ işğali altında bulunğan» territoriya olaraq tayin ete. Vesiqada, Qırımda Rusiyeniñ quvetleştirilgen arbiy mevcütligi, ve 2014 senesinde Rusiye tarafından işğal etilgen soñ yarımadanıñ mensübiyeti dünya toplulığı tarafından tanılmağanı aqqında aytıla.

Vesiqada: «Qırımda ecnebiy memleketlilerniñ ve yañı akimiyetke qarşı çıqqan yerli ealiniñ vekilleriniñ taqipleri devam ete», – denile.

Qırımnıñ Rusiyege tabi akimiyeti açıq menbalarda bu husuta izaat bermedi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı.

XS
SM
MD
LG