Rostov vilâyetiniñ 1-nci nomeralı Tahqiqat izolâtorında advokat Aleksandr Popkov «Yaltadaki Hizb ut-Tahrir işi» boyunca tevqif etilgen aq-uquq qorçalayıcısı Emir-Useyin Kuku ile körüşti. Bunı Facebookta Azatlıq Radiosı jurnalisti Anton Naumlük bildirdi.
Naumlük: «Advokatnıñ aytqanına köre, Kukunıñ körünişi bir qarar, o, yuquğa toymağan kibi körüne, çünki onıñ ücresinde 17 kişi içün sekiz yataq bar, ve olar nevbet ile yuqlaylar. Mahkemedeki davanıñ başlanması aqqında suhbetlerşitler», – dep, tafsilâtlar bildirdi.
Onıñ bildirgenine köre, Popkov Kuku ile körüşüvni eki saat qadar bekledi, ve onıñnen yalıñız yarım saat laf etti.
Jurnalist, Kukunıñ sözlerini şu şekilde ketire: «Mahkemeden yahşı bir şey beklemeyim, bu akemlerni endi köre-köre toydım, lâkin kene de küreşecekmiz».
Daa evel Popkov Kuku ve «iş»niñ diger figurantı Vadim Siruknıñ Rusiye Tahqiqat izolâtorlarında aşalanğanları aqqında malümatnıñ teşkerilmesini istedi.
Yanvarniñ 10-nda Rostovdaki Şimaliy Kavkaz arbiy okrugınıñ mahkemesinde «Yaltadaki Hizb ut-Tahrir işi» figurantları boyunca azırlıq otıruşuvı yapılacaq. O, qapalı rejimde ötkerilecek.
Dekabrniñ 4-nde Aqmescitte Rostov okrugınıñ arbiy mahkemesi seyyar oturışuvında «Yaltadaki Hizb ut-Tahrir işi»niñ figurantları Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovnıñ apis muddetini 2018 senesi mayısnıñ 27-sine qadar uzattı.
Daa evel «Yalta altılığı»nıñ işi boyunca tahqiqatnıñ bitirilgeni belli oldı. Qabaatlanğanlarnı Rostov-na-Donu şeerine yolladılar.
«Yaltadaki Hizb ut-Tahrir (Rusiye ve onıñ tarafından ilhaq etilgen Qırımda yasaq etilgen teşkilât) işi» boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular – İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş (Krasnokamenka) köyüniñ sakini Enver Bekirov ve Yaltadan çeçek satıcısı Vadim Siruk.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
