Link açıqlığı

Saatnıñ esas haberi

Advokat, Kuku ve Siruknı aşalağanları aqqında malümatnıñ teşkerilmesini talap ete


Aleksandr Popkov
Aleksandr Popkov

Rusiyeli advokat Aleksandr Popkov, apis yerlerinde «Yaltadaki Hizb ut-Tahrir işi» figurantları Emir-Useyin Kuku ve Vadim Siruknı ziyaret etmek ricasınen Krasnodar ve Rostov cemiyet közetüv komissiyalarına (CKK) muracaat etti. Cemiyetçilerniñ malümatına köre, Kuku etap boyunca endi Rostov-na-Donuğa ketirildi. Siruknıñ bulunğan yeri şimdilik belli degil. Bunı advokat Qırım.Aqiqat içün izaat bergende bildirdi.

Advokat: «Sekizinci elden keçip, parça-parça olıp yetken malümatlar Siruk ve Kukunen beraber tranzit kamerasında bulunğan adamdan keldi. O, Kukunı çıqarıp, bir daa ücrege ketirmegenlerini bildirdi. Ondan soñ Siruk, olarğa köpeklerni ustıra, tepmeley ve «yolda coymağa» vade etkenlerini bildirdi. Bular bu künlerde olğan şeyler. Çarşenbe (dekabr 27 – QA) künü etap boyunca yollaycaq ediler. Olarnen alâqa yoq», – dep ilâve etti.

Dekabrniñ 4-nde Aqmescitte Rostov okrugınıñ arbiy mahkemesi seyyar oturışında «Yaltadaki Hizb ut-Tahrir işi»niñ figurantları Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovnıñ apis muddetini 2018 senesi mayısnıñ 27-sine qadar uzattı.

«Yalta altılığı»nıñ işi boyunca tahqiqat bitirildi. Qabaatlanğanlarnı Rostov-na-Donu şeerine yollaylar.

Yaltadaki «Hizb ut-Tahrir (Rusiye ve onıñ tarafından ilhaq etilgen Qırımda yasaq etilgen teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Bu iş boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çeçek satıcısı Vadim Siruk.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG