Ukrainanıñ Televideniye ve radioeşittirüvler boyunca Milliy şurası Herson vilâyetinden ilhaq etilgen Qırımnıñ territoriyasına telekösterüvler ve radioeşittirüvlerni translâtsiya etmek içün fevral ayına bir sıra izinler azırlay.
Bunıñ imkânı, Ukrainanıñ «Terrorizmge qarşı operatsiya zonası ve Ukrainanıñ sıñır boyundaki rayonlarında yayınlamaq içün berilgen muvaqqat izinler ile alâqalı olğan bazı Ukraina qanunlarına deñişmeler kirsetüv aqqında» qanunınıñ qabul etilmesi neticesinde peyda oldı. Bunı Qırım.Aqiqatqa Milliy radasınıñ azası Serhiy Kostınskıy bildirdi.
Kostınskıy: «Şimdi dört radiostantsiya ve beş televizion kanal Qırımğa yayınlarını translâtsiya eteler. Bu, kerekli vesiqalar alınmasınıñ murekkepligi ile bağlı. Yayınlav içün (yarışsız ve litsenziya almayıp – QA) izinlerniñ berilmesi, Ukrainanıñ uquqiy negizine esaslandırıldı. Biz Çaplinkağa yedi ve Çonğarğa qoşumça üç-dört sıqlıqnıñ berilecegini bekleymiz. Mevcüt olğan tertip boyunca Herson vilâyetinde sıqlıqlarnı Romaniya, Bulğaristan ve Türkiyenen uyğunlaştırmaq kerek ola – bu, pek uzun bir protsess, lâkin fevralde biz raqamlı televideniye ve FM radio içün izinler bere bilecekmiz», – dep añlattı.
Ukraina prezidenti Petro Poroşenko Ukrainanıñ «Terrorizmge qarşı operatsiya zonası ve Ukrainanıñ sıñır boyundaki rayonlarında yayınlamaq içün berilgen muvaqqat izinler ile alâqalı olğan bazı Ukraina qanunlarına deñişmeler kirsetüv aqqında» qanunını imzaladı.
Vesiqanıñ azırlanması üstünde işlerni Ukrainanıñ Milliy radası ve İnformatsion siyaset nazirligi başlağan ediler. Ondan soñ o, Yuqarı Radanıñ söz serbestligi ve informatsion siyaset meseleleri boyunca komiteti tarafından soñunace işlep çıqıldı ve parlametnke taqdim etildi.
Qanun «menfiy tışqı informatsion tesirlerden eñ ziyade zararlana bilecek territoriyalarda» telekösterüvlerni yayınlamaq içün muvaqqat izinlerniñ tezleştirilgen şekilde berilmesini uyğunlaştıra.
Rusiye ve onıñ ittfaqdaşları, Rusiye tarafından kontrol etilgen territoriyalar – ilhaq etilgen Qırım ve işğal etilgen Donbassnıñ bir qısmında Ukraina kütleviy haber vastalarınıñ yayınlavlarını toqtattı. Bu sebepten Ukrainanıñ kütleviy haber vastaları Kyivniñ kontroli altında olmağan territoriyalarğa öz signallarını iriştirmek içün imkânlar qıdıralar.
Misal içün, Ukrainanıñ Milliy içtimaiy radio şirketi ile beraber de ilhaq etilgen Qırımda orta AM dalğalarındaki 549 kHz sıqlığında eşittirüvlerini yayınlağan Qırım.Aqiqat Radiosı, 2017 senesi sentâbrniñ 4-nden başlap, FM diapazonınıñ 105,9 MHz sıqlığında künde 24 saat içinde Qırım içün radioeşittirüvlerini translâtsiya etmege başladı. Ukrainanıñ Şarqındaki şeerlerde FM diapazonında çalışqan ve Ukrainanıñ Dünya radio hizmetiniñ orta dalğalarında (1431 kHz) radioeşittirüvlerini yayınlağan Donbass.Aqiqat Radiosı leyhası, 2016 senesi yanvarniñ 23-nden başlap, Donetsk ve Lugansk vilâyetleriniñ Ukrainanıñ kontroli altında olmağan rayonları içün yayınlarını translâtsiya ete.
