Ukraina tış işleri naziri Pavlo Klimkinniñ Almaniya tış işleri muessiseniñ yolbaşçısı Zigmar Gabriel ile körüşüvinde, ilhaq etilgen Qırım ile Rusiye apishanelerinde tutulğan siyasiy mabüslerni azat etüv meselesi muzakere etildi. Bunı Ukraina TİN siyasiy şubesiniñ yolbaşçısı Aleksey Makeyev Twitterde bildirdi.
Makeyev: «Pavlo Klimkin ve Zigmar Gabrielniñ bugünki subetlerinde, işğal etilgen Donbasstan rehinlerniñ, em de Rusiye ve ilhaq etilgen Qırımdan Kremlniñ siyasiy mabüsleriniñ evge qaytarılması muim edi. Pavlo Klimkin siyasiy mabüslerniñ cedvelini berdi. Almaniyanıñ bu meseledeki tesiri – al eticilerden biridir», – dep qayd etti.
Almaniya tış işleri naziri Zigmar Gabriel resmiy ziyaret ile Ukrainada buluna.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
