Qırımtatarlarnıñ liderleri Refat Çubarov ve Mustafa Cemilev yürtdaşlarına yılbaş tebrikleri ile muracaat ettiler. Tebriklerniñ metinleri siyasetçilerniñ resmiy Facebook saifelerinde derc etildi.
Ukraina halq deputatı Mustafa Cemilev, keçeyatqan yıl murekkep edi, dedi. Aynı zamanda, siyasetçiniñ fikrine köre, 2017 senesi «halqara toplulıqta Qırım ilhaqınıñ tanılmamasına dair umumiy noqtai-nazar mevcüt» olğanını kösterdi.
Cemilevniñ muracaatında: « Ukraina er kün, adım-adım mustaqil, demokratik ve Avropağa ait devlet olaraq özüniñ noqtai-nazarını qorçalay ve bu cümleden öz vatandaşlarını terk etmey, Kremlniñ siyasiy mabüslerini ve esirlerni azat ete», – denile.
Meclis reisi Refat Çubarov, keçken yıl «Qırım tarihında onlarca Qırım siyasiy mabüsleriniñ sınavlardan şerefnen keçkenleri ve boyun egmegenleriniñ yılı olaraq qalacaq», dedi.
Meclis reisi: «Zaman kelir ve Qırımtatar Milliy Meclisi ile yerli meclislerniñ azaları, qırımtatar milliy areketiniñ faaliyetçileri ve İslâm qanunlarına itina ile riayet etken musulmanlarğa qarşı Rusiye işğalcileri tarafından yapılmaqta olğan evlerge vahşiyce basıp kirüvler, aşalayıcı tintüvler, qanunsız tevqif etüvler, mahkemeler ve taqip etüvler keçmişte qalacaqlar», – dedi.
Refat Çubarov yürtdaşlarına «eminlik, quvet ve irade» tilep, «er evde tınçlıq ve raatlıq olsun», dedi.
