Link açıqlığı

Kyivde balalarnı oyunlar ve ediyeler vastasınen qırımtatar tiliniñ ögrenilmesine celp eteler


Kyivde «Tilde birlik» tedbiri, 2017 senesi dekabr 26 künü

Kyivde dekabrniñ 26-sında «Tilde birlik» tedbiri ötkerildi. Onıñ çerçivesinde balalarnı qırımtatar tili ve medeniyetiniñ ögrenilmesine celp ettiler.

Bunı Qırım.Aqiqat muhbiri bildire.

Tedbirniñ teşkilâtçıları olğan Ukraina İnformatsion siyaseti nazirligi ve Qırımtatar Milliy Meclisi, oyun şeklinde tuvğan tilniñ qıymetini köstermek ve aynı zamanda Qırımnıñ ilhaqı aqqında ikâye etmek içün farqlı yaşta olğan balalarnı topladılar.

Bildirüvde, balalar türlü tüsteki yürek şekilleri üstünde muim sayğan qırımtatar sözlerini yazdılar, denile.

İnformatsion siyaset naziriniñ birinci muavini Emine Ceppar: «Menim sekiz yaşlı qızım «işğal» sözüni yazdı. Böyle tedbir vaziyetni uyğunlaştırmaq ve balalarğa añlatmaq içün bir fırsattır», – dedi.

O, yarımadada tillerniñ bastırılması meselesiniñ mevcut olğanı aqqına ikâye etti. Onıñ esaplavlarına köre, yarımadadaki mekteplerde ukrain tilinde tasil alğan 350 kişi qaldı, qırımtatar tilinde oqutqan 15 mektep bar. Faqat bu, artıq «formal şekilde adlandırıluv, çünki program deñiştirildi: (bu mekteplerde – QA) derslikler ve oqutuv rus tilindedirler», dep qayd etti Emine Ceppar.

Tedbirniñ teşkilâtçıları balalarğa ediye olaraq ukrain tilinde qırımtatar masalları kitaplarını berdiler. Tasil tedbiri tatlı sofra ile yekünlendi.

XS
SM
MD
LG