Qırımtatar halqınıñ lideri, Ukraina halq deputatı Mustafa Cemilev Qırım jurnalisti Mıkola Semenanıñ kitabına «Qırım işğaliniñ entsiklopediyası» dedi, dep bildire Qırım.Aqiqat muhbiri.
Cemilev kiriş sözünde: «Bu kitapqa Qırım işğaliniñ entsiklopediyası demek mümkün. O, em arbiy, em insan aqları, em sağlıq saqlav, em de iqtisadiyat kibi bütün ceetlerini qaplap ala. Yani er şeyni. Eger insan bu kitapnı başından soñuna qadar oqusa, oña başqa bir şey kerek olmaycaq. Qırımda olğan er şey mından añlaşıla», – dedi.
Ukraina jurnalisti Mıkola Semenanıñ qalemine ait «Qırımnıñ 2014-2016 işğali hronikasınıñ «Qırım reportajı» («Крымский репортаж» хроники оккупации Крыма 2014-2016») adlı kitap dekabrniñ 21-sinde Kyivdeki «Qırım evi» merkezinde taqdim etildi.
Kitapnıñ prezentatsiyasına Ukrainada AQŞ Elçiligi missiyasınıñ yolbaşçısı Corc Kent, Qırımtatar Milliy Meclisiniñ azaları, İnformatsion siyaseti naziri Yuriy Stets, jurnalistler, siyasetçiler ve faaliyetçiler keldiler.
Qırım.Aqiqat tedbirden canlı yayın alıp bara
Qırımda Kremlniñ kontroli altında bulunğan mahkemeniñ jurnalistke qarşı çıqarğan qararından evel neşir etilgen bu kitapqa Mıkola Semenanıñ 2014 senesiniñ aprelinden 2016 senesiniñ apreline qadar Qırım.Aqiqat saytında derc etilgen maqaleleri kirdi.
Kitapnı, bir sıra aq-uquq qoruyıcı teşkilâtlarınıñ teşebbüsinen, Azat Avropa Radiosı/Azatlıq Radiosınıñ razılığı ve Ukraina İnformatsion siyaset nazirliginiñ qol tutuvı ile «Devlet gazeta ve jurnal neşriyatı» çıqardı.
Azatlıq Radiosı ve Qırım.Aqiqat muellifi, Qırım jurnalisti Mıkola Semena, açıq surette Rusiyeniñ topraq bütünligini bozmağa davet etkeninde qabaatlandı.
2017 senesi dekabrniñ 22-sinde Kremlniñ kontroli altında bulunğan Qırım Yuqarı mahkemesi, Semenağa qarşı çıqarılğan qararnıñ qoşumça cezalandıruv qısmını biraz yımşatıp, cemiyet faaliyetinde iştirak etmesine yasaq muddetini eki yılğace eksiltti.
Mıkola Semena, öz materiallarında «fikirni serbest ifade etüv»ge aqqını qullandı, dep israr ete.
Ukraina Tış işleri nazirligi, AQŞ Devlet departamenti, Avropa Birligi ve bir sıra halqara teşkilâtları Mıkola Semenağa qarşı çıqarılğan qararnı taqbih ettiler.
Azat Avropa Radiosı/Azatlıq Radiosınıñ prezidenti Tom Kent, jurnalist Mıkola Semenağa qarşı qabaatlavlarnıñ esassız olğanını söylep, Qırımda Kremlniñ kontroli altında bulunğan mahkeme tarafından çıqarılğan qarar lâğu etilmek kerek, dedi.
