Link açıqlığı

İçtimaiy siyaset boyunca komitet Radağa Qırım ve Donbasstaki siyasiy mabüslerge yardım etüv boyunca qanun leyhasını qabul etmege tevsiye etti


Natalya Veselova

İçtimaiy siyaset, iş ve pensiya ile teminlev boyunca komitet Yuqarı Radağa, Rusiye akimiyet orğanları tarafından siyasiy sebeplerden azatlıqtan marum etilgen şahıslarnı siyasiy mabüsler tanuv ve olarğa devletten içtimaiy yardım ve imtiyazlar berüvniñ şartları ve tertibi boyunca qanun leyhasını birinci oquvda qabul etmege tevsiye etti. Bunı dekabrniñ 20-sinde halq deputatı Natalya Veselova bildirdi.

Bildirilgeni kibi, içtimaiy siyaset komiteti Radağa Qırımda siyasiy mabüsler, olarğa içtimaiy yardım ve imtiyazlar berüv aqqında qanun leyhasını negiz olaraq qabul etmekni teklif etti.

Veselova Facebooktaki saifesine: «Biz bu vesiqağa qol tuttıq, amma daa da işlenmesi şartınen. Ömürge keçirilüvniñ ameliy mehanizmlerni daa da işlemek kerek. Baqıluv esnasında komitet azalarında pek çoq sual doğdı. Rusiye apishanesinde oturğan adam içtimaiy qorçalav organlarına nasıl etip muracaat ete bilecek? Amelde yardımnı kim alacaq: apayı, balaları, adamnıñ özümi?», – dep qayd etti.

Onıñ aytqanına köre, Ukrainanıñ kontroli altında bulunmağan Donbass territoriyasında tutulğan mabüslerge kelgende de belli bir sualler doğa bile.

Halq deputatı Mustafa Cemilev iyulniñ 13-nde Ukraina Yuqarı Radasına siyasiy mabüsler aqqında qanun leyhasını teslim etti. Onda, Qırımda ya da qomşu Rusiyede siyasiy sebeplerden azatlıqtan marum etilgen Ukraina vatandaşlarına er ay para tölenmek ve imtiyazlar berilmek kerekligi aqqında söz yürsetile.

Qanun leyhasına dair izalav tezkeresinde, siyasiy mabüslerge içtimaiy tölevler içün 2018 senesindeki Ukraina büdjetinden 4,5 million hrivna ayırılmaq kerek olacaq, dep bildirile. Bu miqdar 50 şahısqa içtimaiy yardımnıñ tölenmesi içün kerek olacaq.

XS
SM
MD
LG