Ukrainanıñ qırımtatar asıllı rejissörı Ahtem Seytablayevniñ «Kiborglar» draması Ukrainada eki afta soñu devamında 15 million 752 biñ 356 hrivna topladı. Bunı dekabrniñ 18-nde Ukrainanıñ Kino meseleleri boyunca Devlet agentliginde bildirdiler.
Devlet kino agentliginiñ Facebooktaki resmiy saifesinde, bu muddet içinde filmni 212 biñ 182 kişi seyir etti, denile.
Devlet kino agentliginiñ reisi Filipp İlyenko: «Ekinci afta soñunda filmde 184 ekran qaldı. Ve bu, «Yıldız cenkleri» («Star Wars») kibi küçlü bir filmniñ çıqqanına baqmadan, kinoteatrlarnıñ «Kiborglar»ğa işanğanlarını köstergen yahşı bir köstergiçtir», – dedi.
«Kiborglar»nıñ prodüseri İvanna Dâdüra seyircilerge, filmge qol tutqanları ve pervasız qalmağanları içün teşekkürlerini bildirdi.
«İçtimaiy ağlarda sıcaq ve o qadar teren seslenüvler içün er keske teşekkür etem. İnsanlarnıñ filmge bir qaç kere barğanı ise ilerlemek ve keyfiyetli bir Ukraina kinosını çıqarmaq içün ilham bere. Ondan ğayrı, «Men pervasız degilim» teşebbüsiniñ çerçivesinde elâk olğanlarnıñ qorantaları içün toplanğan yardımnıñ miqdarı 1 million 60 biñ 910 hrivna teşkil etkenini qayd etmek kerekim», – dedi prodüser.
Kösterilüviniñ birinci afta soñu içünde film, ülke içinde Ukraina filmleriniñ kösterilüvi neticesinde toplanğan para boyunca yañı rekord qoydı.
«Kiborglar» filmi Ukrainada keniş kösterilüvge dekabrniñ 7-nde çıqtı. Film, Ukrainanıñ ülke Şarqındaki terrorğa qarşı operatsiyası esnasında Donetsk ava limanı içün yapılğan uruşlar aqqında ikâye ete. Rejissör Seytablayev öz filminiñ janrını arbiy drama dey.
Film Ukraina Devlet kino agentliginden 24 million hrivnağa yaqın yardım aldı. Bu, onıñ umumiy istisal fiatınıñ yarısını teşkil ete.
