Türkiye vatandaşından «aqsız yerde para talap etüv işi» boyunca tevqif etilgen qırımtatar faaliyetçisi Bekir Degermenci muvaqqat izolâtorında yazğan mektübini yolladı. İçinde qırımtatar milliy areketiniñ veteranı Veciye Kaşka ile nasıl etip tanış olğanını yazdı.
Mektüpniñ metnini Facebookta onıñ qızı Mavile Degermenci derc etti.
«Bu qadınnen qorantasında olıp keçken adiselerden soñ pek yaqınlaşqan» Degermenci: «Bu, 2015 senesinde oğlum Mustafa Degermenci tevqif etilgen soñ oldı. Bu adiseden evel men bu acayip qadın (Veciye Kaşka – QA) aqqında yalıñız eşitken edim. O, oğlumnıñ mahkeme oturışuvlarına sıq-sıq kele edi», – dep yazdı.
Onıñ aytqanına köre, o, tanışlarınen beraber sıq-sıq Kaşkağa musafirlikke bara edi.
Degermenci: «Oña, qolumızdan ne kelse, onı yapıp yardım ete edik. O, türlü uydurma qabaatlavlar boyunca yaqalanğan balalar içün pek telâşlana edi», – dep bildirdi.
Ondan ğayrı Degermenci, Kaşkanıñ türkiyeli kiyevi tarafından hırsızlandı dep aytılğan paralarnı ne içün qaytarmağa yardım etkenini, tafsilâtlı surette añlattı.
Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarn Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Degermencide sürekli astma bar. Muvaqqat izolâtorda sağlığınıñ vaziyeti birden yamanlaştı. Faaliyetçi, dekabrniñ 6-nda Kremlniñ kontroli altında bulunğan Qırım Yuqarı mahkemesiniñ zalında yaramadı. Oña «acele yardım» çağırıldı. Dekabrniñ 14-nde o, reanimatsiyağa tüşti. Daa soñra, ekimlerniñ Degermencini esas olaraq ilâclar tesirindeki yuquda tutqanları belli oldı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
