Ukraina aq-uquq qoruyıcıları AB ülkeleri, AQŞ ve Kanada liderlerine muvaqqat izolâtorda sağlığı birden yamanlaşqan qırımtatar faaliyetçisi Bekir Degermencige mustaqil ekimlerniñ yiberilmesine yardım etmeleri içün muracaat ettiler.
Qırım aq-uquq qoruyıcı grubu dekabrniñ 14-nde Ukraina aq-uquq qoruyıcı teşkilâtlarınıñ umumiy muracaatını ilân etti.
Bildirüvde: «Halqara teşkilâtlarınıñ vekillerine, Avropa Birligi ülkeleri, İsviçre (Şveytsariya), AQŞ ve Kanada akimiyetlerine, Bekir Degermenciniñ sağlıq vaziyeti ve sözde aqsız yerde para talap etüv boyunca işniñ figurantlarına qarşı siyasiy maqsatlı cinaiy işniñ ketişatı, em de diger siyasiy maqsatlı cinaiy işlerniñ ketişatını közetmeleri içün muracaat etemiz», – denile.
Aq-uquq qoruyıcıları dünya cemaatçılığından, Degermencige azırlıqlı tıbbiy yardımınıñ kösterilüvine yardım etmesini, cümleden Degermencige ve diger tıbbiy yardımğa muhtac olğan siyasiy mabüslerge mustaqil ekimlerniñ halqara grubunıñ yıberilüvini Rusiyeden talap etmesini rica eteler.
Ondan ğayrı aq-uquq qoruyıcı teşkilâtları, Ukraina ve diger devletlerniñ akimiyetlerine, em de halqara teşkilâtlarına muracaat etip, Degermenci ve diger siyasiy mabüslerniñ apisten azat etilmelerine ve olarğa qarşı bildirilgen qabaatlavlarnıñ adaletli surette baqılmasına yardım etmekni rica ettiler.
Bekir Degermenci dekabrniñ 14-ne keçer gecesinden başlap pek ağır vaziyette reanimatsiya bölüginde buluna.
Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarn Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
