Qırımtatar Milliy Meclisi, Avropa Birligi Parlament Assambleyasınıñ (ABPA) rehberleri ve azalarına muracaat azırlap, onda Assambleyanı Rusiye eyetiniñ qaytarılmasına yol bermemege davet etti.
Bunı dekabrniñ 12-sinde Facebooktaki saifesinde Qırımtatar Milliy Meclisi reisi Refat Çubarov bildirdi.
ABPA rehberlerine doğrultulğan muracaatnıñ metninde: «Rusiye iç bir şartsız ABPAğa qaytsa, Assambleya ve onıñ azaları Moskva ile birlikte Qırımda bundan soñ farqlı tüşünüv ve azatlıqnı bastırmaq maqsadınen yapılacaq alıp qaçuvlar, tevqif etüvler ve eziyetlevler içün mesuliyetli olacaqlar», – denile.
Ondan ğayrı Çubarov, Qırımtatar Milliy Meclisi reisiniñ muavini Ahtem Çiygoz dekabrniñ 13-nde Strassburgda bir qaç körüşüv yapıp, «ABPAda Rusiye eyetiniñ vekâletlerini qaytarmaq/qaytarmamaq meselesi boyunca Qırımtatar Milliy Meclisiniñ baqışını tanıtacaq», dep bildire.
Qırımnıñ ilhaqından soñ ABPA tarafından eyetine qarşı sıñırlavlar tatbiq etilgen içün (eyet rey berüv ve onıñ azaları Assambleyanıñ baş olrganlarında çalışuv aqqından marum etildi) Rusiye özü Assambleyanıñ işlerinde iştirak etüvden vazgeçip, aqımdaki yılnıñ yazında Avropa Birligine azalıq bedeliniñ tölevinden vazgeçti. Moskva, kelecekte böyle sanktsiyalarğa yol bermemek içün ABPAdan reglamentniñ deñiştirilmesini talap ete.
Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
