Oktâbrniñ 12-sinde Bağçasarayda yaqalanğan Bağçasaraydaki «Hizb ut-Tahrir işi» figurantı Seyran Saliyevniñ oğlu Salih babasına açıq mektüp yazdı.
Bunı dekabrniñ 10-nda Facebookta «Qırım birdemligi» cemiyet areketi bildire.
«Qırım birdemligi» Salih Saliyevniñ mektübinden sözlerni, «Biz sennen ayrılıqta olğanımız çoq olmadı, amma sanki uzun yıllar keçti… Babam, balalığım keçti! Lâkin men ağlamayım, babam. Sabır etem… Peyğamberler ve sahabelerniñ ikâyelerini oquyım. «Ertuğrul»nıñ (Türkiye serialı – QA) bir seriyasını bile qaçırmayıp baqam. Sen aytqanıñ kibi. Aqiqat, ne olsa da, yeñer. Yamanlıq cezalanacaqtır» şeklinde ketire .
Oktâbrniñ 12-sinde ilhaq etilgen Qırımda Rusiye telükesizlik hadimleri Bağçasaraynıñ altı sakini: Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tevqif ettiler. FSB olarnı Rusiye ve ilhaq etilgen Qırımda yasaq etilgen «Hizb ut-Tahrir» teşkilâtında iştirak etkenlerinde qabaatlay.
Rusiyeniñ kontroli altında bulunğan Aqmescitteki Kyiv rayonı mahkemesi 2017 senesi dekabrinde Bağçasarayda oktâbrniñ 12-sinde yaqalanğan «Hizb ut-Tahrir işi»niñ altı figurantlarından episine ve bu cümleden Seyran Saliyevge tevqif muddetini üç ayğa uzattı.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» ilân etilgen 15 birleşmeniñ cedveline kirsetip, yasaq etti.
Qırımda Rusiyeniñ ilhaqından soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
