Link açıqlığı

Saatnıñ esas haberi

Apis etilgen Qırım aq-uquq qoruyıcısı Kuku halqara kampaniyasınıñ qaramanı oldı (+ video)


Ukrainada «Mektüpler yazuv marafonı: cesaretlilernen yan-yanaşa» adlı halqara aq-uquq qoruyıcı kampaniyası başlana. Qırımtatar faaliyetçisi, «Yaltada Hizb ut-Tahrir işi»niñ figurantı Emir-Useyin Kukunıñ mahkeme işi bu yıl Marafonnıñ esas qısımlarından biri oldı. Amnesty International teşkilâtı aq-uquq qoruyıcısınıñ taqdiri ve yaqalanuvı aqqında animatsion rolikni taqdim etti.

Amnesty International halqara aq-uquq qoruyıcı teşkilâtınıñ Ukrainadaki sözcüsi Mariya Guryeva Qırım.Aqiqatqa: «Biz bu halqara kampaniyasınıñ çerçivesinde öz ve başqa adamlarınıñ aq-uquqlarını nasıl etip qorçalamaq kerekligini añlatmaq içün materiallar azırlaymız. Bu rolik Emir-Useyin Kukunıñ ömür arqadaşı Meryemniñ ikâyesi ile özümiz yapqan haberler talili esasında meydanğa ketirildi. Teessüf ki, bu adise unikal degil, Qırımda bir çoq qırımtatarlar ve narazılıq köstergenler buña beñzer aq-uquq bozuluvlarından zarar köreler», – dep ikâye etti.

Крымский правозащитник стал героем ролика Amnesty International (видео)
Bekleñiz, lütfen

No media source currently available

0:00 0:01:27 0:00

Aq-uquq qoruyıcıclarınıñ fikrine köre, Emir-Useyin Kukunıñ işi – ilhaq etilgen Qırımda umumen olayatqanlarını köstergen bir levhadır.

Rolik üzerinde ukrain animatorı Vladislav Burbela çalıştı.

2017 senesiniñ «Mektüpler yazuv marafonı: cesürlernen yan-yanaşa» halqara aq-uquq qoruyıcı kampaniyası 200-den ziyade ülkeden faaliyetçilerni topladı. Faaliyetçiler arizalar imzalamağa, mektüpler yollamağa, haberler dağıtmağa davet eteler.

Bu yıl Ukrainada Marafon on birinci kere ötkerile.

Yaltada «Hizb ut-Tahrir işi» boyunca qabaatlanğanlarnı 2016 senesi fevralniñ 11-nde tevqif ettiler. Olarnıñ arasında İnsan aqları boyunca alâqa tutuv gruppasınıñ azası Emir-Useyin Kuku, qurucılar olıp çalışqan Aluştalı Muslim Aliyev ile Qızıltaşlı (Krasnokamenkalı) Enver Bekirov ve Yaltadan çiçek satıcı Vadim Siruk bulunalar.

Mahkeme Qırım aq-uquq qoruyıcısı, «Yaltada Hizb ut-Tahrir işi»niñ figurantı Emir-Useyin Kukuğa apiste bulunuv müddetini 2017 senesi dekabrniñ 8-ne qadar uzattı. Advokat Aleksey Ladinniñ bildirgenine köre, Qırımlı aq-uquq qoruyıcısınıñ umumiy apis müddeti 21 ay ve 27 künni teşkil etti.

«Hizb ut-Tahrir işi» boyunca yaqalanğan ve mahküm etilgen Qırım sakinleriniñ imayecileri, olarnıñ taqibi din alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esas itibarı ile qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.

Halqara islâmiy siyasiy teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni, «terroristik» olaraq belgilengen 15 birleşmeniñ cedveline kirsetip, yasaq etti.

XS
SM
MD
LG