Link açıqlığı

Uquqqoruyıcı: Rusiyenen Qırım içün cenk meydanları – diplomatiya, siyaset ve aq-uquqtır


Ukrainadaki İnsan aqları boyunca Helsinki ittifaqınıñ yolbaşçısı Boris Zaharov

Rusiyenen ilhaq etilgen Qırım içün zemaneviy «cenk meydanları» – diplomatik meydançıqlar, siyaset ve aq-uquq, çeşitli halqara mahkemeleridir, dedi noyabrniñ 17-sinde Qırım.Aqiqat Radiosınıñ «Kündüzki şou» canlı efirinde Ukrainadaki İnsan aqları boyunca Helsinki ittifaqınıñ yolbaşçısı Boris Zaharov.

«Qırımnıñ qaytarılması içün küreş, tam bir qanunsızlıqqa qarşı küreştir. Rusiye Qırımnı Ukrainadan küç qullanıp hırsızladı. Bu ilhaq, Avropanıñ II Cihan Cenkinden soñraki tarihında birinci böyle adisedir. İnsan aqları boyunca Avropa mahkemesi, eñ tesirli mehanizmlerden biridir. Ukrainanıñ şimdi Rusiyege qarşı beş devletlerara mahkeme davası bar. Ondan ğayrı bizde Avropa mahkemesinde Qırım ve Donbass boyunca 200 mahkeme işi bar», – dedi Zaharov.

Onıñ degenine köre, Avropa mahkemesinde ilhaq etilgen Qırım meselesi boyunca işlerniñ çezilüvinde üç seviye bar. Bunıñ kibi yaqın zamanlarda olmağan adise ile alâqalı olaraq kompensatsiya, mahkeme qararlarınıñ eda etilmesi ve qanunlarnıñ ihtimallı deñiştirilmesi aqqında söz yürütile.

«Bizim Avropa mahkemesinde Qırım davalarınıñ çoqusı boyunca Rusiyege qarşı vaziyetimiz bayağı küçlüdir. Bunıñ neticesinde Rusiyede çıqış qalmay bilir – ya qaçaq devlet olacaq, ya da vaziyetni tüzetmege ve böyle etip «darbeni yımşatmağa» tırışacaq», – dedi uquqqoruyıcı.

2017 senesi iyülinde Ukraina Telükesizlik hizmetiniñ başlığı Vasyl Grytsak, Ukrainanıñ Gaagadaki BMT Halqara mahkemesine Rusiye tarafından Donbass ve Qırımda tecavüz etilgenini tasdiqlağan deliller teslim etkenini bildirdi.

Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG