Moskova nezaretindeki Qırım akimiyeti, Bağçasaraydaki Hanlar Sarayınıñ sekiz obyektiniñ "rekonstruktsiyasını" yapacaq tış icracısını tapmadı. Bu, Rusiye devlet satın aluv saytında bildirile.
Yazılğan ki, "rekonstruktsiyağa" 315,7 million ruble masraf etmege azır ediler.
Devlet satın aluv saytındaki malümatqa köre, yarışta iştirak etemek içün iç bir ariza olmağanı sebebinden, auktsionnı keçersiz saydılar.
Daa evel Rusiye kontrolindeki Qırım yolbaşçısı Sergey Aksenov, Bağçasaraydaki Hanlar sarayınıñ «restavratsiyasını» 2021 senesi bitirecekler, dep bildirdi.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
