Bağçasaraydaki Hanlar sarayınıñ «restavratsiyasını» 2021 senesi bitirecekler, dep bildirdi Rusiye kontrolindeki Qırım yolbaşçısı Sergey Aksenov.
«Restavratsiya devam ete. Er şey planğa uya. İnce bir iş… 2021 senesi bitirecekmiz», – dep bildire Aksenovnıñ aytqanlarını TASS Rusiye haber agentligi.
Qırımnıñ Rusiye medeniyet naziri Arina Novoselskaya, «Qırım hanlarınıñ sarayı beş asırlıq tarihında ilk sefer bütünley restavratsiya yapıla», dep ayttı.
«Tolu restavratsiya olacaq. Hanlar sarayını qapatmamaq içün kompleks 16 obyektke bölüne», – dedi Novoselskaya. Onıñ aytqanına köre, al-azırda qurucılıq-montaj işleri büyük camide, saraynıñ baş korpusında ve Şahin qullesinde keçirile.
Nazirniñ malümatına köre, Han sarayınıñ tışqı körünişini ğayrıdan tiklev programmasına tahminen 2 mlrd ruble (qararnen 75 million ğrıvnâ – QA) kerek olacaq.
Kyiv, Rusiye akimiyetiniñ Hanlar sarayında keçirgen «restavratsiyanı» çoq tenqit etken edi. Ukraina medeniyet nazirligi bu işler sebebinden Hanlar sarayınıñ baş korpusı yoq etile bile, dep bildire.
Qırımtatar faali Edem Dudakov Bağçasaraydaki Hanlar sarayınıñ «restavratsiya» neticelerini «butaforiya» dep adlandırdı. O, Büyük Han cami «rekonstruktsiyasınıñ» birinci basamağı yekünlengenine dair malümatnı böyle izaatlağan edi.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
