Rostov-na-Donu şeerindeki Cenübiy Bölge Arbiy mahkemesi, Yalta "Hizb ut-Tahrir davası" boyunca soñki söz aytmaqnıñ kününi 2019 yılı noyabr 8-ine deñiştirdi. Bunı Qırım.Aqiqatqa advokat Edem Semedlâyev haber etti.
"Bugün oturışta prokuror öz sözüni ayttı. Bundan soñ dava iştirakçileri, soñki sözge azır olğanlarını ilân etti. Amma mahkemeci, bizge belli olmağan sebeplerge köre, oña, müşterilerimiz azır degil, dep körüngeni sebebinden, sanki azırlıq körmek içün eki aftalıq teneffüsni ilân etti", - aytıp berdi advokat.
Advokat, mahkeme mahkeme protsessini aselet uzata, dep tüşüne. Qabaatlav tarafınıñ tefsirleri şimdilik yoq.
Rusiye prokurorı, beraber qoşıp sayğanda, Yalta "Hizb ut-Tahrir davası"nıñ iştirakçileri içün 98,8 yıllıq apis cezasını istedi: Muslim Aliyevğa - 20 yıl, İnver Bekirovğa - 20,6 yıl, Emir-Üsein Kukuğa - 15 yıl, Vadim Sirukqa - 15 yıl, Arsen Cepparovğa - 13,6 yıl, Refat Alimovğa - 14,6 yıl.
Bu dava boyunca qabaatlanğanlar 2016 yılınıñ fevral-aprel aylarında tutulğan edi. Olarnı, Rusiyede yasaqlanğan islâmiy siyasiy "Hizb ut-Tahrir" teşkilâtına aitliginde qabaatlaylar.
Ukrainanıñ Tış İşler Nazirligi, Yalta "Hizb ut-Tahrir davası"nıñ iştirakçilerini azat etmege Rusiyeden talap ete.
