Halqara uquq qorçalayıcılar, işğal etilgen Qırımda nezaret vazifesiniñ tafsilâtlarını aytıp berdi. Belarus İnsan Aqları Evininiñ vekili Tatyana Revâko qayd etkenine köre, uquq qoruyıcılar 50-ge qadar adamnı soraştırıp, 20 intervyü keçirdi.
“Biz 20-den ziyade körüşüv ötkerdik, azatlıqtan marum etmegen cinayet mahkeme ükmü olğan jurnalist ve faalcilernen, memuriy mesülietke çekilgen faalcilernen, siyasiy mabüslerniñ soylar, apaylar, analar ve balalarınen qonuştıq. Men, Qırımda qullanılğan qabaatlavlar ve müthiş usullarnıñ seviyesi ve kölemine şaştım”, - dedi Revâko.
Uquq qoruyıcı missiyasınıñ esas vazifesi - Qırımda söz, silâsız toplaşuv ve birleşüvlerniñ serbestligi, bundan ğayrı, uquq qoruyıcılar ve faalcilerniñ taqibatınen bağlı meselelerniñ ögrenüvi edi dep qoştı Çernigov İnsan Aqları Eviniñ vekili Kirill Yekimov.
İnsañ aqları haber merkeziniñ başı Tatyana Peçonçik matbuat konferentsiyasında aytqanına köre, nezaret neticeleri aqqında tafsilâtlı esabat bu yıl oktâbr ayında yayınlanacaq.
Evel haber etilgeni kibi, Azerbaycan, Belarus ve Ukraina insan aqları Evleriniñ vekilleri Qırımnı ziyaret etti. Olar işğal etilgen yarımadada sentâbrniñ 14-nden 18-ne qadar bulundı.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan "Hizb ut-Tahrir" teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
