Kyivde halqara ve ukrain aq qorçalayıcılarınıñ Qırımda kerçekleştirgen monitoring neticeleri matbuat brifinginde taqdim etilecek.
Aq qorçalayıcılar sentâbrniñ 14-nden 18-ne qadar işğal etilgen Qırımnı ziyaret etti. Monitoringde Azerbaycan, Beyazrusiye ve Ukraina insan aqları evleriniñ vekilleri iştirak etti.
Brifing teşkilâtçılarınıñ malümatına köre, aq qorçalayıcılarınıñ missiyası söz serbestligi, toplaşuv ve birleşüv problemleri, em de Qırımdaki aq qorçalayıcılar ve cemaat faalleriniñ taqip etilmesini qayd etmekten ibaret edi.
İşbu ziyaretniñ kerçekleştirilmesine İnsan aqları evleriniñ fondu (Oslo, Norvegiya) ve People in Need teşkilâtı (Praga, Çeh Cumhuriyeti) yardım etkenler.
BM, Rusiyeni halqara missiyalarğa işğal etilgen Qırımğa kirmelerine imkân bermesine çağırğan edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
