Link açıqlığı

Saatnıñ esas haberi

“Titan” zavodınıñ taşlantıları içün Ermeni Bazardan balalarnı çıqaracaqlar


Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti. Bunıñ aqqında o Facebookta yazdı.

“Fevqulâde vaziyetni ilân etmek içün sebep yoq. Amma aqibetniñ aldını almaq içün Ermeni Bazarnıñ mektep ve bala bağçaları içün eki aftalı tatil yapmağa, ve mektep çağına yetmegen ve mektep çağındaki balalarnı - analarınen - bizim Qırım sanatoriylarına raatlanmağa yollamağa qarar aldıq”, - denile beyanatta.

Aksönovnıñ malümatına köre, şeerde acele merkez (operativ ştab) yaratıldı.

Qırımnıñ şimalinde zararlı taşlamalarnıñ kölemi normadan tış çıqtı. Qırımnıñ rusiyeli başlığı Aksönovnıñ aytqanına köre, “Qırım titanı” zavodınıñ işi eki aftağa toqtatıldı.

Evel haber etkenimiz kibi, Ermeni bazar sakinleriniñ evlerinde madeniy şeylerni bir gecede yapışaq tot bastı. Şeerliler içtimaiy ağlarda yazğanına köre, bu - “Qırım titanı” zavodınıñ zararlı atıqları olmaq mümkün.

Qırımnıñ ekologiya Nazirliginiñ malümatına köre, müessisege yarımadanıñ sakinlerinden Ermeni bazar ve Krasnoperekopsk çerçivesinde avağa zararlı maddelerniñ taşlanması aqqında şikâyetler kele edi.

​“Qırım titanı” zavodı daa 1971 senesi işini başladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.

XS
SM
MD
LG