Rusiye Fevqulade vaziyetler Hızmeti (FVH), olarğa yarımadanıñ şimaliy şeerlerniñ sakinleriden Ermeni bazar (Armânsk) ve Krasnoperekopsk çerçivesinde sanayı taşlamalar aqqında şikâyet kelmegenini bildire. Bunıñ aqqında avgustnıñ 28 FVH başlığınıñ yardımcısı Vladimir İvanov jurnalistlerge haber etti.
“101 nomerine bir de bir şikâyet, havflı adiseler içün ya da birev yanğanı, özüni yaramay duyğanı içün telefon etilmedi. Bundan sebep, FVH bilinmegen bir şeyniñ yoq etüvine qoşulmadı ve onda iştirak etmedi”, - dedi İvanov.
Avgustnıñ 27 Ermeni bazarnıñ rusiyeli akimiyeti, bir kün evel yerli sakinler bildirgen avağa taşlamalar aqqında “Qırım titanı” zavodınıñ başlığına malümat talabını azırlağanını haber etti.
Aynı vaqıtta rusiyeli Ekologiya ve tabiat resursları Nazirligi, “Laboratoriya talili ve tehnikiy deñişmeler merkezi”niñ ekspertlerini Qırımnıñ şimalinden olğan zararlı taşlamalar aqqında malümatnıñ teşkerüvine celp etti.
Qırımnıñ ekologiya Nazirliginiñ malümatına köre, müessisege yarımadanıñ sakinlerinden Ermeni bazar ve Krasnoperekopsk çerçivesinde avağa zararlı maddelerniñ taşlanması aqqında muracaatlar kele.
“Qırım titanı” zavodı daa 1971 senesi işini başladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.
