Qırımda “Tavrida” trassası boyu insan sağlığına zararlı olğan ambroziya ösümlikniñ bayağı çıtırmanlıqları östü. Bunı Qırım.Aqiqatqa qırımlı iş adamı Oleg Zubkov aytıp berdi.
“Aqmescitten (Simferopol) başlap, tap Qarasuvbazarğace (Belogorsk) “Tavrida” trassası boyu havflı kiyik ot - ambroziyanıñ sıq-sıq öskenini körmek mümkun. O endi güllep başlay ve bunıñ aqibetleri ciddiy olması mümkün. Yazıq ki, Qırım akimiyeti buña diqqat ayırmay”, - dep qayd etti Zubkov.
Onıñ fikrince, “Tavrida” trassası yanında o qadar çoq ambroziya olğanınıñ sebebi - yol qurulmasına ketirilgen topraq, yani o topraqta ösümlik urluqları bar olğanı sebebindedir
“Ekseriy alda ambroziya trassa qurulışı içün ketirilgen topraqta öşüp çıqtı”, - dedi o.
Aqmescit rayonınıñ bir qaç qasabasında ambroziya güllegeninden sebep karantin başlandı. Bunı Aqmescitniñ rusiyeli akimiyetiniñ matbuat hızmeti haber etmekte.
İyülniñ soñunda Aqmescit rayonınıñ Qoyaş (Vodnoye) ve Demyanovka köylerinde de ambroziya sebebinden karantin ilan etrilgen edi.
Ambroziya - kiyik ösümlik, onıñ çeçek tozu allergik reaktsiyasınıñ sebebi olmaq mümkün. Yuşan yapraqlı ambroziya - Qırım, Ukrainanıñ bir qaç vilayeti ve qomşu Rusiyeniñ Krasnodar ülkesinde tarqalğan kiyik otlarınıñ eñ havflı soylarından birisi.
