Kremlniñ kontroli altında olğan Qırım Yuqarı mahkemesi «Veciye Kaşka işi» figurantlarınıñ tahqiqat izolâtorında tutuluv müddetiniñ uzatılmasına qarşı apellâtsiyalarını red etti. Bunı Qırım.Aqiqat muhbiri bildirdi.
Böylelikle, Bekir Degirmenci, Asan Çapuh, Kâzim Ametov ve Ruslan Trubaç izolâtorda sentâbr 14-ke qadar qalacaqlar.
Asan Çapuhnıñ advokatı Aleksandr Lesovoy, imayesi altında olğan şahısnıñ apellâtsiyasınıñ baqılmasını belli bir müddetke toqtatmaqnı rica etti, çünki o, oturışuvdan evel yaramadı ve bu sebepten onda iştirak etip olamaycaq edi.
Tahqiqat izolâtorınıñ feldşeri, Çapuhta arterial basımınıñ köstergiçleri, oña tıbbiy yardım kösterilgen soñ da 190-ğa 110 olğanını bildirdi. Lâkin akem Aleksey Kozırev advokat Lesovoynıñ muracaatını red etti.
Muhakeme etilgenler oturışuvda video alâqa vastasınen iştirak etti ve onıñ esnasında defalarca alâqanıñ yaramay keyfiyetine Kozırevniñ diqqatını çektiler. Bu münasebet ile Degermenciniñ advokatı Edem Semedlâyev iş figurantlarınıñ mahkemege ketirilmesine dair muracaat etti.
Oturışuvda aynı bunıñ kibi tahqiqat izolâtorından video alâqa vastasınen iştirak etken Semedlâyev: «Alâqa pek yaramay, protsessniñ 60%-ini biz asıl da eşitmeymiz», – dep añlattı.
Akem advokatnıñ muracaatını red etti. Buña cevaben Semedlâyev akemniñ davadan çetleştirilmesini talap etti. Mahkeme çetleştirüvni de red etti.
2017 senesi noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar.
Olarnı, Türkiye vatandaşından aqsız yerde para talap ettiler, dep şübheli tanıdılar. Yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadın vefat etti.
Bundan evel, bu işniñ figurantlarında sağlıq ile ciddiy problemalar olğanı bildirilgen edi. Bekir Degermencide sürekli astma bar. Çapuh tahqiqat izolâtorında mikroinsult keçirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqası bar dep şübheli sayılğan Qırım musulmanlarınıñ evlerinde muntazam surette kütleviy tintüvlerni teşkil ete.
