Qırım.Aqiqat muhbiri, ağustos 23-te qırımtatar faaliyetçisi Çapuh Kremlniñ kontroli altında olğan Qırım Yuqarı mahkemesiniñ nevbetteki oturışuvından evel yaramadı, dep bildire. Bu sebepten mahkeme «Veciye Kaşka işi» figurantları tarafından berilgen apellâtsiyanıñ baqılmasını planlaştırılğan vaqıtta başlap olamadı.
Qırım.Aqiqat muhbiriniñ bildirgenine köre, tahqiqat izolâtorınıñ feldşeri mahkemege Çapuhnıñ oturışuvda iştirak etip olamaycağını tasdiqladı ve diñlemelerni bir saattan soñ başlamaqnı tevsiye etti.
Feldşer mahkemede video alâqa vastasınen: «Şimdiçik oña kirip, arterial basımını teşkerdim. O, onda pek yüksek, o, özüni pek yaramay is ete. Basımı tüşken daqqada (oturışuvda – QA) iştirak ete bilecek, lâkin şimdi bunıñ içün alı yoq», – dedi.
Ağustos 21-de «Veciye Kaşka işi» boyunca qabaatlanğan qırımtatar faaliyetçisi Asan Çapuhta arterial basımı yükseldi. Bu sebepten o, mahkemeniñ oturışuvında iştirak etip olamadı.
2017 senesi noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar.
Olarnı, Türkiye vatandaşından aqsız yerde para talap ettiler, dep şübheli tanıdılar. Yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadın vefat etti.
Bundan evel, bu işniñ figurantlarında sağlıq ile ciddiy problemalar olğanı bildirilgen edi. Bekir Degermencide sürekli astma bar. Çapuh tahqiqat izolâtorında mikroinsult keçirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqası bar dep şübheli sayılğan Qırım musulmanlarınıñ evlerinde muntazam surette kütleviy tintüvlerni teşkil ete.
