50 fayızdan ziyade rusiyeli pensiya islâatına qarşı mitinglerge çıqmağa azır. Bunı rusiye “Levada-tsentrom” teşkilâtı keçirgen içtimaiyat soravınıñ neticeleri köstere.
Hususan, avgust ayında soralğanlarnıñ 53 fayızı narazlıqlqa qoşulmağa azır olğanını bildirdi, 42 fayızı - red etti.
İyül ayında keçirilgen soravda ise, 37 fayız - çıqmağa azır edi, 53 - mitinglerde iştirak etecekleri şübeli dep ayttı.
Soravğa köre, böyle kibi aktsiyalarğa qoşulmağa istemegenlerniñ çoqusı - endi pensiya alıp turğan adamlar.
Bir kün evel Aqmescitte Rusiye Kommunist Partiyasınıñ yerli bölügi pensiya islâatına qarşı daa bir mitingni keçirdi.
Avgustnıñ 29-ında Rusiye prezidenti Vladimir Putin televizion hitabında pensiya yaşını arttırmağa teklif etti - qadınlarğa 60 yaşınace, akimiyet teklif etken 63-kece degil. Amma aqaylarğa kelgende, Putin Medvedev akimiyetinen razı, olar pensiyağa 65 yaşında çıqmaq kerek. Bundan ğayrı, pensiyağa yaqın yaştaki halqnıñ işten çıqaruv ya da işke almamazlıq meselesi içün memuriy ve cezaiy mesüliyetni belgilemek kerek dep qoştı o.
