Bağçasarayda, “Qırım birdemligi” birleşmesiniñ faalcisi Osman Belâlovnıñ evinde tintüv keçirilgeniniñ videosını çekken, Selim Teyfukov ve Eldar Ümerov tutuldı. Bunıñ aqqında “Qırım birdemligi” birleşmesiniñ faalcileri haber ete.
Başta polis hadimleri aqaylarnıñ yanına kelip, vesiqalarını köstermege rica etti, soñra maskalı adamlar faalcilerni tutıp aldı. Şimdilik olar Bağçasaray şeerindeki polis bölüginde bulunmaqta.
Haber etilgeni kibi, aqaylarğa uquqiy yardımnı etmek içün polis bölügine imayeci Ruslan Abduraşitov keldi.
Keççe Eldar Ümerov ve Selim Teyfukovnı azat ettiler. Polisler olarnıñ fotosını çekti ve parmaq izlerini aldı.
Sentâbrniñ 13-ünde saba rus quvetçileri “Qırım birdemligi” birleşmesiniñ faalcisi Osman Belâlovnıñ evinde tintüv keçirdi. O - Bağçasaray “Hizb-ut-Tahrir davası”nıñ iştirakçisi Memet Belâlovnıñ ağası. Tintüvden soñ Belâlovlarnıñ babasını tutıp aldıdlar.
Ukraina Tiş işler Nazirligi, “Qırım birdemligi”niñ faalcisi Osman Belâlovnıñ evinde tintüv keçirilmesini takbih ete.
2016 senesi Qırımnıñ rusiyeli mahkemesi Osman Belâlovqa 10 biñ ruble para cöremesi tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüvyapqanını eşitip, kafe yanında toplanğan ediler.
