Rus quvetçileri sentâbr 18-inde saba Borçoqraq-5 (Fontanı-5) qasabasında, Ayder ve Arsen Bekirovlarnıñ evinde tintüv keçire. Bunıñ aqqında “Qırım birdemligi” birleşmesi haber ete.
Ev yanında avtozaklar tura, tahqiqiy tedbirlerni rusiye küç organlarınıñ hadimleri keçire.
Qomşularnıñ aytqanına köre, Arsen Bekirov - qurucı olıp çalışa, qardaşı Ayder ise evinde maşna tamirlevinen oğraşa. Arsenniñ apayı, Elmira, mektepte qırımtatar tili ocası vazifesini becere dep haber eteler “Qırım birdemligi”nde.
“Evniñ içinde esli qadın, Lilâ hanım, buluna, o 62 yaşında, hasta. Tintüv vaqtında o yaramadı. Acele yardımnı çağırttılar. O ilk yardımnı yapıp, ketti, qadın özüne keldi”, - dep aytıla beyanatta.
Sentâbr 13-üne saba rus quvetçileri “Qırım birdemligi” faalcisi Osman Belâlovnıñ evinde tintüv keçirdi, o, o zaman evde olmadı. Tintüvden soñ Belâlovlarnıñ babasını tutıp aldılar ve soñra yiberdiler.
Birleşken Milletler bu seneniñ ilk yarım yılında işğal etilgen Qırımnıñ ev ve toplaşuv yerlerinde yapılğan tintüvlerniñ sayısı keçken seneniñ yarım yılına baqqanda üç qat çoq olğanını qayd ete. Bu aqta işğal altındaki Qırımnıñ insan aqları vaziyetine dair maruzasında aytıla. Vesiqa sentâbrniñ 13-nde Kyivde Ukrainadaki BM insan aqları monitoring missiyasınıñ reisi Fiona Freyzer tarafından taqdim etildi.
Teşkilâtnıñ malümatına köre, tintüvlerde ekseriy aldı qırımtatarlar zarar kördi.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan "Hizb ut-Tahrir" teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
