Ellina Şnurko-Tabakova, Ukraina Haber tehnologiyaları şirketleri Derneginiñ idare başı, Telegram messenceriniñ işançlılığı yeterli derecede degil dep saya. Qırımlılar, rusiye mahsus hızmetleri tarafından yazışuv sırı bozulmasın dep, onı qullanmasa daa yahşı dep qoşa o.
Böyle fikirni ekspert Qırım.Aqiqat Radiosınıñ efirinde ifade etti.
“Men eşittim ki, Telegramniñ şifrlemesi, başqa messencerlerge köre, işançlı degil. Trampqa berilgen esabatlarda, Telegram kanalları oqulğanında şek bar. Böyle kibi şübeli malümat bar olğanı içün, o messencerni azca qullanmaq kerek demektir. Bu mevzuda o qadar çoq laf etilme, kerçekmi, yalanmı olğanını özüñde teşkerip baqmaq kerekmey dep tüşünem. Bir mesele - adiseler aqqında ikâye etken kanallarnı oqumaq, başqası ise - öz malümatıñnı, belki de havflı ola bilgen soyunı, onıñ ile yollamaq. Zaten, er yañı messencer, mahsus hızmetler onı bozıp açmağance, evelkinden yahşıca”, - dep qoştı o.
Bundan ğayrı, Şnurko-Tabakova, er türlü rusiye messencerlerinden bütünley saqınıp, com alanını qullanğan programma ve bağlayıcırlarğa (kommunikatorlar) keçmege tevsiye ete.
İyül ayında Roskomnadzor (Alâqa, informatsion tehnologiyalar ve kütleviy kommunikatsiyalar saasında nezaret boyunca federal hizmet) alâqa operatorlarına, Telegram messencerini qullanuvından saqındırmaq, mektüp yolladı. Müessisede bildirdeler ki, teminci (provayder) şirketler içün “itibarğa telüke ve başqa telükeler” aqqında hatırlattı.
Aprel 16-sından mahkeme qararına binaen Rusiyede, FSB hadimlerine qullanıcılar beyanatlarınıñ şifr anahtarını bermekni red etkeni içün, Telegram blok etildi. Messencer, bloklavdan vazgeçmek içün, Amazon ve Google amerikan şirketleriniñ hızmetlerini qullanğanı içün, Roskomnadzor olarğa irişimni de sıñırlap başladı. 20 millionğa yaqın adresler blok etildi. Telegramğa barğanda, o alâ daa çalışa.
Messencer ve yaratıcılarına qol tutuv aktsiyaları Moskova, Peterburg ve Rusiyesniñ başqa şeerlerinde keçti.
