Qırımnın rusiye akimiyeti, 2019 senesine pensiyalılarnıñ yaşayış azğarınıñ kölemini 8560 ruble miqdarında tasdıqladı, bu yılğa köre, o 30 rublege atqan. Böyle qarar, oktâbr 31-inde Qırım akimiyetiniñ oturışında qabul olundı.
“RİA Krım” haber etkeni kibi, akimiyet başı Vladimir Konstantinov, şimdi Qırımda yaşayış azğarına teñ kelsin dep pensiyasına qoşma para alğan 85 biñ 484 adam bar.
Qırım parlamentiniñ qarına binaen, 2018 senesinde pensiyalılarnıñ yaşayış azğarı 8530 ruble.
Oktâbr 3-te Rusiye prezidenti Vladimir Putin pensiya islâatı aqqında qanun toplamını imzaladı. Qomşu Rusiyede aqaylarnıñ pensiya yaşı adım-adım 65 yaşınace köterilecek, qadınlarnıñ ise - 60 yaşınace. Müddetten evel pensiyağa çıqamaq içün aqaylarğa 42 yıllıq iş stajı kerek, qadınlarğa - 37 yıllıq.
Daa evel Kreml nezareti altındaki Qırım ve Aqyar akimiyetleri pensiya islâatı aqqında rusiye qanun leyhasına qol tuttı.
Yarımadanıñ çeşit köşelerinde Rusiye Kommunist fırqası pensiya islâatına qarşı miting ve piketler keçire, imza cıya. Çoqusı qasabalarnıñ akimiyeti böyle toplaşuvlarğa izin bermey.
