Koreiz qasabasında beş qatlı evniñ damı yanıp başladı, bunıñ aqqında Qırımnıñ fevqulade vaziyetler Hızmetiniñ (FVH) matbuat hızmeti haber etti.
Avgustnıñ 14-ünde “15:21 qurtaruv hızmetine Yujnaya, 48 soqağında beş qatlı mesken evde yanğın peyda olğanı aqqında haber etildi. Adise olıp keçken yerge kelgen soñ, 400 metr kvadrat qadar ev damı yanğanı belli oldı”, - dep aytıla beyanatta.
Yanğınnıñ neticesinde zarar körgen üç büyük adam ve üç balağa vaqtıncalıq mesken berildi.Bunıñ aqqında Kreml nezareti altındaki Yalta şeer memüriyetiniñ matbuat hızmeti haber etti.
“Üç büyük adam ve üç bala “Yalta şeer pansionatı” binasında yerleştirildi”, - dep haber etti şeer başı Aleksey Çelpanov ve başqa kvartiralarnıñ sakinleri köçmekni red etkenlerini qoştı.
Çelpanov, şeer memüriyeti “yanıp bitken evniñ dam ve ögüni tamirlemek içün qısqa vaqıtta para ayıracağını” qayd etti dep matbuat hızmeti haber ete.
Bir kün evel Yalta yanındaki Üç Qoş deresinde üç kün devam etken yanğın söndürildi. Fevqulade vaziyetler Hızmetiniñ (FVH) matbuat hızmetiniñ malümatına köre, yanğın 26 gektarlıq meydannı qaplap aldı.
Bundan ğayrı, yanğıncılar Livadiya rayonında “Massandra” yüzümliklerniñ yanında yanğınnı söndüre edi.
