Ukraina prezidenti Petro Poroşenko, Kyivde Zabitler Evinde rey berdi. O saylav bölügine qadını ve balaları ile keldi, dep bildire Radio Svoboda.
“Nastoyaşçeye Vremâ” kanalınıñ jurnalistleri bildirgeni kibi, prezident kelmezden evel qanun qoruyıcıları bina ögünde yol areketini toqtattı.
“Bugün men Ukraina içün rey berdim. Men eminim, aynı qorantam ve ukrainlerniñ çoqusı kibi. Bugün men, saylavları yahşı teşkil etlgeninde eminim. Bu - bizim ilerilemizniñ esas şartıdır”, - bülletenni qutuğa taşlağan soñ dedi o.
Martnıñ 31-inde Ukrainada prezident saylavları keçe. Bu yer içün 39 namzet küreşe. Saylav bölükleri öz işini saat 8:00-da başladı ve 20:00-ğace çalışacaq. Ukraina prezidenti saylavları umumiydir. 18 yaşına kelgen bütün Ukraina vatandaşlarınıñ rey berüv aqqı bar. Saylavda iştirak etmek içün saylavcınıñşahsiyetini tasdıqlağan vesiqa olmalı. Merkeziy saylav komissiya, saylav neticelerini aprelniñ 10-unace ilân etmek kerek. Saylavnıñ birinci basamağında ğalebe qazanmaq içün bir de bir namzet 50%-dan reyni almaq kerek. Öyle birisi olmasa, saylavnıñ ekinci basamağı aprelniñ 21-inde keçirilecek. Qırımlılar qıta Ukrainada rey bere bile.
