2019 senesi ekinci "Qırım inciri" edebiy yarışında iştirak etken 125 müellif arasında eki siyasiy mabüsniñ eserleri bar.
"Müelliflerniñ birisi - Osman Arifmemetov - halq jurnalisti, "Qırım birdemligi"niñ faali. 2019 senesi mart ayında onı ev tintüvinden soñ tevqif ettiler. Oña, sanki terrorcılıq teşkilâtınıñ faaliyetiniñ teşkil etüvi içün 20 yılğa qadar apis cezası üküm etile bile. Osman ukrain tiltibnde nesirni yolladı", - haber eteler yarış teşkilcileri.
Malümatqa köre, konkursta iştirak etken ekinci siyasiy mabüs - Server Mustafayev - "Qırım birdemligi" teşkilâtınıñ koordinatorı, halq jurnalisti.
"2018 senesi mayıs ayında rusiye quvetçileri onıñ evine tintüvnen keldi. Server Mustafayevni terrorcılıq teşkilâtınıñ faaliyetinde iştirak etkeninen bağlı sahte dava boyunca qabaatlana. Oña 20 yılğa qadar apis cezası üküm etile bile. Server qırımtatar tilinde yazılğan şiirni yolladı", - denile beyanatta.
Ekinci "Qırım inciri" edebiy yarışına 300-den çoq metin yolladı, olarnıñ arasında: ukrain tilinde - 165 eser, qırımtatar tilinde - 83, qırımtatar tilinden ukrain tiline tercimeler -35, ukrain tilinden qırımatatar tiline tercime - 21. Teskilcilerniñ malümatına köre, bu yıl yarışta Ukrainanıñ 20 vilâyetinden, bundan ğayrı, Türkiye, Poloniya, Bulğaristan ve Ürdünden müellifler iştirak etti.
"Qırım inciri"niñ short list ilânı 2019 senesi dekabr 1-inde yapılacaq.
“Qırım inciri” yazıcılar yarışı 2018 senesi yazda ilân etildi, konkurs eserleriniñ qabul etüvi oktâbrniñ 31-inde bitti. Bu vaqıt devamında jüri azaları, “Ukrain tilinde Qırım aqqında nesir”, “Qırımtatar tilinde nesir”, “Ukrain tilinde Qırım aqqında şiiriyet”, “Qırımtatar tilinde şiiriyet”, “Qadın nazarı”, “Qırımtatar tilinden ukrain tiline tercime”, “Ukrain tilinden qırımtatar tiline tercime” nominatsiyalarında 135 müelliften 244 iş aldı.
Sentabrde Lvivde 26-ncı Neşirciler forumı çerçivesinde "Qırım incirini cıyaraq" şiiriyet ve nesir oqumaları keçirildi.
