"Veciye Kaşka davası" boyunca mahkemelengen qırımtatar faali Asan Çapuh saqatlığını resmiyleştire, dep bildirdi onıñ advokatı Ayder Azamatov.
“Men yaqında Kiyev rayon mahkemesiniñ ükmüne apellâtsiya şikâyetini berdim, çünki onı absurd sayam. Asan ağanen olıp keçken daa bir adise aqqında aytıp bermek isteyim. Asan ağanıñ sağlığı yaramaylaşqanı içün, o saqatlığını resmiyleştirip başladı”, - aytıp berdi Azamatov aprelniñ 28-inde “Qırım birdemligi”niñ oturışında.
Azamatovnıñ aytqanına köre, SİZOda ekimler komissiyası, Çapuh “mesuliyetlikten qaçmaq istey”, dep qabaatladı.
“Men onen laf etkende, o bunıñ içün hoşnutsız edi ve bir daa anda barmaycağını ayttı. Köremiz ki, tibbiyet hadimleri bile, onıñ meselesini bilip, oña menfiy munasebet köstere. Bu yaramay tendentsiya. Menimce, bunı böyle qaldırmaq mümkün degil, biz bu areketlerge cevap kösterecekmiz”, - dedi Azamatov.
Daa evel bildirile edi ki, “Veciye Kaşka davası”nıñ iştirakçileriniñ imayesi, Qırımda Rusiye mahkemesiniñ ükmüni temyiz etti.
Aprelniñ 17-sinde Rusiye kontrolindeki Aqmescitniñ Kiyev rayon mahkemesi para talap etkenlerinde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç,Bekir Degermenci ve Kazim Ametov 3 yıl sınav müddeti ile 3 yılğa şartlı olaraq üküm etildi. Asan Çapuh 3 yıl sınav müddeti ile 3,5 yılğa şartlı olaraq üküm etildi,
Üküm istinafı baqılğanına qadar mabüsler ev apsinde bulunacaq.
Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
