Avgustnıñ 8-inde saba içtimaiy ağlarda ve bazı KHV-nda Ukrainanıñ sabıq halq mebusı Oleg Tsarövniñ ölümi aqqında haber peyda oldı. Keççe, Qırımda gizlenip oturğan deputat, öz öldürüvi aqqında malümatnı red etti. Bunı o Qırım.Aqiqatqa bergen tefsirde ayttı.
“Meni onlarca kere endi kömdüler, atta cesetimniñ fotosüretlerini köstere ediler. Şimdi de bu feykniñ red etüvi şasırtacaq şey degil… Meni yarım yılda bir kere defin eteler. Eñ azı”, - dedi Tsaröv.
O şimdi işğal etilgen Yaltada bulunğanını haber etti.
Sabıq “Partiya Regionov”nıñ adliyecisi Aleksandr Yefremovğa esaslanaraq bir qaç jurnalist ve KHV Facebook saifelerinde Oleg Tsarövniñ ölümi aqqında haber berdi.
Eks-deputat Oleg Tsaröv, Ukrainanıñ topraq bütünligi ve masuniyetine qast etkeninde, bundan ğayrı, konstitutsiyalı qurum devrilüvi ve quvet yolunen deñiştirüvi areketlerinde qabaatlana. Oña 10 yılğa qadar apis cezası berile bile.
Ukrainanıñ baş prokurorlığı, Qırım.Aqiqatnıñ resmiy soratmasına cevap olaraq, Tsaröv 2014 senesi iyünniñ 19-ından qıdıruvda olğanını haber etti. Ukrainanıñ İçki işler Nazirliginiñ (İİN) saytında, Tsaröv Donetsk vilâyetinde ğayıp olğanı bildirile.
Keçken yılı Qırımnıñ rusiye akimiyeti Tsarövniñ qorantasına üç sanatoriyni -rekonstruktsiyağa ve üç danesini kiralıqqa bergen edi. Aqmescit rayonındaki “Yujnaya” quş fabrikası da oña kiralıqqa berildi.
Bugünge, Yanukoviç prezidentligi vaqtında, 1 million dollarğa yaqın fiyatqa alınğan Yalta merkezindeki, sanatoriy Tsarövğa ait.
