Salı künü, avgustnıñ 23-nde, bu yıl Rusiyeniñ Ukrayınağa qarşı cenki sebebinden online keçirilecek «Qırım platformasınıñ» ekinci sammiti olacaq.
Telükesizlik maqsadınen Ukrayına akimiyeti tedbirniñ vaqtını, tam iştirakçi cedvelini aydınlatmadı.
Ukrayına Tış işler naziri Dmıtro Kuleba «bu yılnıñ sammiti em iştirakçi sayısınen, em global coğrafiyasınen ve temsilciler seviyesinen ayrette qaldıracaq», dep bildirdi.
Bundan ğayrı, Ukrayına Tış işler naziriniñ birinci muavini Emine Ceppar sammitte «Yedi gruppasınıñ» memleket liderleriniñ ekseriyeti iştirak etecek, dep bildirdi.
«Qırım platformasınıñ» sammitinde NATO Baş kâtibi Jens Stoltenberg iştirak etmege niyetlene.
«Qırım platformasınıñ» birinci tesis sammiti bıltır avgustnıñ 23-nde oldı. 47 çetel devlet ve halqara teşkilât iştirak etti.
«Qırım platforması» – Ukrayınanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
