Kreml nezaretinde olğan Qırımnıñ Yuqarı mahkemesi, ekinci Bağçasaray «Hizb ut-Tahrir davası»nıñ mabüsi Server Mustafayevniñ anası Venera Mustafayevanıñ davası boyunca istinaf şikâyetini berme müddetini uzatmağa izin bermedi. Qadın oğlunıñ destegine keçirgen bir kişilik piket içün para cezasına mahküm etilgen edi.
Bunı «Qırım birdemligi» cemaat birleşmesi haber ete.
Faallerniñ malümatına köre, mahkemeci Venera Mustafayevanıñ «qanunnen belgilengen müddet içinde arizanı bermek imkânı olğanını» sayağan.
Advokat Lilâ Gemeci bu qararğa itiraz etti ve devamlı hastalıq sebebinden şikâyetni berip olamağanına atfı etti. Mahkeme müddetniñ uzatılması aqqında muracaatnı red etti», – dep haber ettiler birleşmede.
Sentâbrniñ 22-nde qadın Bağçasaray rayonındaki Rusiye İç işler nazirliginiñ bölügine çağırıldı.
Qırımdaki Rusiye İç işler nazirliginiñ saytından Venera Mustafayevağa qarşı açılğan memuriy davalar aqqında malümat yoq.
Sentâbrniñ 15-nde – oğlunıñ ükmü çıqarılğan künü – Venera Mustafayeva Bağçasarayda bir kişilik narazılıq aktsiyasına çıqtı. Qollarında yazuvlı şiar bar edi: «Camideki subetler – cinayet degildir! Oğlumnı qaytarıñız!».
Rusiyeniñ Rostov-na-Donu şeerindeki Cenübiy okrugınıñ arbiy mahkemesi Server Mustafayevni «Hizb ut-Tahrir davası» boyunca 14 yıl sert rejimli koloniyada qalmasına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
