Ekinci Aqmescit «Hizb ut-Tahrir» davasınıñ mabüsleri mayısnıñ 17-nde mahkeme oturışına qırımtatar halqınıñ taqip etilmesini takbih etken yazılarınen plaktlar ketirdiler, dep haber ete «Qırım birdemligi».
«Mahkeme oturışı bitken soñ, mahkemelengen Raim Ayvazov, Remzi Bekirov, Farhod Bazarov, Şaban Ümerov ve Riza İzetov plakatlarnen çıqışta bulundılar. Tevqif etilgen faaller yazıp 1783 ve 2014 seneleri Qırımnıñ işğalini, 1938 senesi qırımtatar ziyalılarınıñ qurşunlanmasını ve 2021 senesi mayısnıñ 11-nde Nabi Rahimovnıñ atıp öldürilmesini hatırlattılar. Mahkeme icracılarınıñ talabınen olar plakatlarnı toplap aldı ve aktsiyanı toqtattı», – dep yazıla faallerniñ malümatında.
Haber etilgenine köre, Ayvazov, Bekirov, İzetov, Ümerov ve Bazarovnıñ davası boyunca mahkeme oturışı advokatnıñ hastalanması içün mayısnıñ 24-ne qaldırıldı.
«Emil Kürbedinov hasta olğanı içün kelip olamadı, o, oturışnıñ başqa künge qaldırılmasını rica etip, yazılı şekilde muracaat etti. Vesiqalanı nevbetteki mahkeme oturışına ketirmege vade etti. Edem Semedlâyev dehasta olğanı içün yoq edi. Aynı muracaatlar Şeyhmambetov ve Legostovdan berildi. Olar bugün Öleg Prıhodkonıñ istinaf şiketi baqılğan mahkeme oturışında ediler», – dep qayd ettiler faaller.
Remzi Bekirov er kesniñ fikrini bildirip, advokatları olmağanı içün bugünki mahkeme oturışında iştirak etmeycelkerini ayttı.
Год в СИЗО: история «второй симферопольской группы Хизб ут-Тахрир» (фотогалерея)
Hatırlatamız, FSB Aqmescitteki «Hizb ut-Tahrir davasınıñ» mabüslerini beş gruppağa böldi.
«Memorial» aq qorçalayıcı merkezi dava mabüslerini siyasiy mabüs dep tanıdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.