Başkortostan koloniyasında ükmüni sürgen "Aqmescit "Hizb ut-Tahrir davası"nıñ iştirakçisi Emil Cemadenov qorantasına telefon etip ceza izolâtorında oturğanını ayttı.
Bunı onıñ qadını Liana Belâlova "Qırım birdemligi" birleşmesine bildirdi.
"O, koloniya şaraitleri aqqında da aytıp berdi. Bundan evel de andaki sert şaraitni bile edik. O dey: "Men 10 daqqağa ceza izolâtorından çıqardılar, şimdi kene kirsetecekler". Ceza izolâtorını daa 15 künge uzattılar ve bunıñ ne vaqıt bitecegi belli degil", - dedi qadın.
Onıñ aytqanına köre, aqayı, onı kitaphanege yibergenlerini ayta, anda çoq kitap bar eken. O bütün kün Qoran oquy.
Daa evel bildirile edi ki, birinci Aqmescit "Hizb ut-Tahrir davası"nıñ iştirakçilerini Rusiyedeki Başkortostan cumhuriyetiniñ Salavat şeeriniñ koloniyalarına mahkeme ükmüne köre ceza çekmek içün ketirdiler.
Rusiye Yuqarı mahkemesi 2019 senesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
