Link açıqlığı

Saatnıñ esas haberi

Qırımdaki mahkeme yerli sakinni qırımtatar batalyonında iştirak etkeninde qabaatlap, 6 yılğa üküm etti


Nümüneviy fotoresim
Nümüneviy fotoresim

Rusiye kontrolindeki Qarasuvbazar rayon mahkemesi «Noman Çelebicihan qırımtatar göñülli batalyonında» iştirak etkeninde qabaatlanğan qırımlınıñ ükmüni çıqardı. Bu aqta TASS Rusiye devlet haber agentligi Qırımdaki Rusiye FSBsiniñ idaresine esaslanıp bildire.

«1996 senesi doğğan ve diger devlette Rusiye Federatsiyasınıñ menfaatlarına zıt maqsadlarınen areket etken «Noman Çelebicihan batalyonında» iştirak etkeni içün tutulğan Qırım Cumhuriyeti sakinine qarşı üküm çıqarıldı, mabüs qabaatlı tanıldı ve altı yılğa üküm etildi, birinci yılını apishanede, beş yılını sert rejimli koloniyada keçirecek», – dep aytıla haberde.

Rusiye FSBsiniñ malümatına köre, er adamı 2022 senesi aprel ayında Rusiye quvetçileri kontrol etken «Ermeni Bazar» keçiş noqtasında Qırımğa kirmege tırışqanda tutuldı.

Mabüsniñ adı ve soyadı aytılmay, izaatlar yoq.

İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» «terrorist» tanıp, Rusiye Federatsiyasında yasaqladı.

Bundan evel işğal etilgen Qırımda qurucısı ATR telekanalınıñ baş müdiri Lenur İslâmov olğan «qırımtatar batalyonınıñ» azası olaraq bir qaç qırımtatarına qarşı qarar çıqarıldı. İslâmov Qırımda «blekautnı teşkil etkeninde» qabaatlanıp, ğıyabiy şekilde 18 yılğa ve 1 mlrd ruble para cezasına üküm etildi. İslâmovnıñ Qırım.Aqiqatqa bildirgenine köre, o, Avropa insan aqları mahkemesine qararnı şikâyet etecek.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.

Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.

«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG