Qırımda 2022 senesiniñ ilk üç ayı içinde Rusiye uquq qoruyıcıları 10 tintüv keçirdi, 59 insannı tuttı ve 69 sorğunı keçirdi. Bu malümatnı Qırımtatar resurs merkezi (QRM) Qırımdaki insan aqlarınıñ bozuluv taliline bağışlanğan online konferentsiyada bere.
Online konferentsiyada QRM idare reisi, Qırımtatar Milliy Meclisiniñ uquqiy meseleler ve tış işler yolbaşçısı Eskender Bariyev ve QRM alâqalar idarecisi Tatyana Podvornâk iştirak ettiler.
«Esabatqa kirgen müddet devamında QRM 59 insan tutuluvını qayd etti, 57-si – qırımtatarı edi. 69 sorğu, sorav ve subet qayd etildi. 59-ı qırımtatarlarğa qarşı. Sorğu ve soravlarğa qırımlılar tintüv ve mitinglerden soñ oğradı», – dep bildirdi Bariyev.
QRM malümatına köre, 2022 senesiniñ başından Qırımda 31 apiske aluv qayd etildi, 28-i – tamır qırımtatar halqına qarşı. 31 adiseden: 6-sı – yañı apis cezası, 13-ü – apiste tutuv müddetiniñ uzatıluvı, 16-sı – üküm, 13-ü – idariy apis cezaları.
Yañı apiske aluvlar Rusiyede yasaqlanğan «Hizb ut-Tahrir» teşkilâtı ve «Noman Çelebicihan göñülli batalyonına» alâqalar davalarınen bağlı edi. İdariy apis cezalarını faaller içtimaiy ağlarda paylaşqanları ve siyasiy mabüslerge qoltutqanları içün aldı.
Qırımtatar Resurs Merkeziniñ bildirgenine köre, Qırımda keçken 2021 senesi aq qorçalayıcılar 366 tutuvnı qayd etti, 330-ı – qırımtatarlarğa qarşı edi. QRM idare reisi, Qırımtatar Milliy Meclisiniñ uquqiy meseleler ve tış işler yolbaşçısı Eskender Bariyevniñ aytqanına köre, bu kategoriyada o qadar bozuv mahkeme, SİZO ve vaqtınca tutuv izolâtorlarınıñ binalarına semetdeşlerine qoltutmaq içün kelgen faallerniñ kütleviy tutuluvınen bağlı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
